سه شنبه پنجم شهریور ۱۳۹۲ - - سجاد -
سویله ای گول هانسی باغین سن گول رعناسی سان
هانسی گولزار بهشتین سروی سن طوباسی سان
بیر بئله گویچکلیگی هاردان یغیبسان بیر یئره
سن بوتون گویچک لرین فرّخ لقا سیماسی سان
چوخ گوزل ترسیم ائدیب رسسام عالم رسمووی
ایله بیر عالم لرین جوشغون اولان دریاسی سان
ایستیرم معنا ائدم گویچکلیگین بیر جمله ده
جمله عاجیزدیر ، اوزون گویچکلیگین معناسی سان
قاش قارا ، کپریک قارا ، باش دا هوروکلر قاپ قارا
بو اوزون گیسوئیله سن کونلومون یلداسی سان
گوزلرین آهویه بنظیر باخماقین عین مارال
بو باخیشلا سئوگیلیم سن کونلومون شهلاسی سان
گولجاغین چیددیر چیچک لر بال آچیر پروانه لر
بول سبب دن قلبیمین سن بولبول شیداسی سان
هر کیمه یاری گوزل دیر بو سوزه وار منطیقیم
سن گولوستان ایچره سینده گول لرین زیباسی سان
شیرینه خاطیر دوشوبدیر داغلارا فرهاد لر
سن ده مجنونون عزیزیم ان گوزل لیلاسی سان
سوزلرینده واردی جان هر کیم اشیدسه جان تاپار
بئیله بیر احوالینان عارف لرین داناسی سان
ظولمولر چکدی نباتی عشقینه ال تاپمادی
سئوگیلیم ایله یقین بو عاشقین ساراسی سان
ای پریوش وصف ده اسگیگ گتیردی سوز (کیان)
آمما باور ایله کی اعلا لارین اعلاسی سان