شنبه پانزدهم مهر ۱۳۹۱ - - سجاد -
گلمیسن جانیم سنه قوربان اولا ایندی نییه؟
دوشموشم الدن داها، ای بی‌وفا، ایندی نییه؟
نوشدارو سن، فقط سُهراب اؤلوب، گئج گلمیسن!
ائیله‌مز تأثیر اونا هئچ بیر دوا، ایندی نییه؟
ممکن اولسا، مرحمت قیل، عؤمرلرده یوخ وفا!
بخش ائدن مهمانینا ذوق و صفا، ایندی نییه؟
من جاوان کن ذوق آلیردیم، نازنینیم، ظولمدن،
ائیله‌ییرسن سؤیله بس جور و جفا، ایندی نییه؟
بیر شیرین صحبت اوچون اگدیم اؤنونده قدّیمی!
زهرتک وئردین جاواب فرهادینا، ایندی نییه؟
ای قارا هیجران، الیندن بیرجه‌دم گؤز یوممادیم!
بختیمی سن توتموسان بولای ـ لایا، ایندی نییه؟
آسمان قیلدی پریشان، حالیمی زار ائیله‌دی
چولقاییب‌دیر عؤمرومو مین بیر بلا، ایندی نییه؟
سن‌کی گول هیجرینده، طبعیم، لال کیمی خاموش ایدین،
سالمیسان بولبول کیمی شور و نوا، ایندی نییه؟
سن حبیب‌سیز "شهریار"یم، گئتمزایدین هئچ یانا،
سون سفردیر، تک چیخیبسان سون یولا، ایندی نییه؟